Алтынньы 3 күнүгэр А.П. Иванов аатынан норуот айымньытын киинигэр Бэрт Ууһун нэһилиэгин дьоһун-мааны далбар хотуна – бары ытыктыыр киһибит — Альбина Львовна Неустроева күн сирин көрбүт күнүгэр анаммыт “Иэйиим кустуктара” кинигэтин сүрэхтэниитэ буолан ааста. Кинигэ 3 бастаах, 318 сирэйдээх, “Алаас” кинигэ кыһатыгар Альбина Львовна төрөппүт оҕолоро үбүлээн бэчээттэтэн таһааттардылар. Кинигэҕэ Альбина Львовна өр сыллаах айар үлэтэ: дьоһун олоҕун туһунан истиҥ ахтыылара, үөрбүт-көппүт, долгуйбут кэмнэрин иэйиитин хоһуйар хомоҕой хоһоонноро, араас таһымнаах тэрээһиннэр сценарийдара, өй, тыл оонньуулара – “Иэйиим кустуктара” диэн сонун, сэргэх ис хоһоонноох, элбэҕи биллэрэр-көрдөрөр суолталаах, ыллыҥ да туһанар олус наадалаах кинигэ буолан күн сирин көрдө. Кинигэ сүрэхтэниитигэр Альбина Львоана чугас дьоно, Бэрт Ууһун түөлбэтин баһылыгын солбуйааччыта Явловскай В.Д., «Эйэҕэс эбээлэр» түмсүү, библиотека уонна норуот айымньытын киинин коллектива эҕэрдэ тылларын эттилэр, бииргэ үлэлээбит дьүөгэлэрэ олохторугар алтыспыт кэрэ бэлиэ кэмнэрин ахтан-санаан ыллылар. Түмүккэ элбэх махтал тыллардаах кэпсэтиинэн тэрээһин түмүктэннэ.
