Алтынньы 10 күнүгэр Бэрт Ууһун нэһилиэгэр «Кыыс Хаҥа» алааска төрөөн-үөскээн, олорон ааспыт Майаҕатта Бэрт Хара туһунан Павел Васильевич Пермяков суруйан таһаартарбыт саҥа кинигэтин презентацията буолан ааста. Yөрүүлээх күн ыалдьыттарынан Камчаткаттан сылдьар журналист, краевед, «Тайна якутских фамилий» кинигэ автора Сергей Иванович Вахрин кэргэнинээн Татьяна Петровналыын буоллулар. Маны тэҥэ историческай наука кандидата Егор Петрович Антонов, историческай наука кандидата Пантелеймон Пантелеймонович Петров, филологическай наука доктора Иннокентий Николаевич Новгородов, историческай наука кандидата Афанасий Алексеевич Николаев, «Доҕордоһуу» Ленскэйдээҕи историко-архитектурнай музей-заповедник директора Айым Степанович Охлопков, Сэһэн Аржаков аатынан улуус түмэлин үлэһиттэрэ Александр Петрович Сивцев, Иван Иванович Окоемов, улуус култуураҕа салаатын начальнига Эльза Михайловна Киренская, улуус библиотекатыттан Мария Петровна Заболоцкая ыалдьыттаатылар. Үөрүүлээх тэрээһини Сэһэн Аржаков аатынан улуус түмэлин үлэһитэ Маргарита Ивановна иилээн ыытта. Тэрээһин кэмигэр П.В.Пермяков «Майаҕатта Бэрт Хара» уонна С.И.Вахрин «Тайны якутских фамилий. Дальний Восток 2 том» кинигэлэрэ атыыланнылар, тутатына автордар илии баттаатылар. Кинигэ «Үйэлэри үлдьү түһэн» диэн бастакы баһыгар, Кыраайы үөрэтээччи, Бороҕоннооҕу краеведческай музей директорынан үлэлээбит Николай Саввич Пестряков 1993 сыллаахха «Майаҕатта Бэрт Хара» диэн оскуола оҕолоругар, учууталларга, киэҥ ааҕааччыга анаан таһааттарбыт кинигэтэ, ааптар бэйэтин уонна кыыһа О.Н.Лукачевская ахтыыларынан ситэриллэн киирбит. Кинигэ иккис, үһүс, төрдүс бастарыгар кыраайы үөрэтээччилэр Сэһэн Боло, А.С.Порядин, А.Г.Местников уо.да. суруйуулара киирбиттэр. «Майаҕатта алааһыгар айан» диэн бэһис баска 2024 сыллаахха атырдьах ыйыгар Майаҕатта Бэрт Хара туһунан пьеса суруллан, сыл бүтүүтэ үүнэр көлүөнэ театрыгар турарынан сибээстээн «Түгэх өбүгэбит олохторунан» экспэдииссийэ айанын туһунан кэпсэнэр. Алтыс баска Бээрийэ кыыһа Хотойук Айгыына уонна Анатолий Кириллин - ДьолуКуус суруйбут пьесалара киирбиттэр. ДьолуКуус суруйбут пьесатынан 2024 сыл ахсынньы 18 күнүгэр Дьокуускай куоракка «Үүнэр көлүөнэ» тыйаатырыгар Майаҕатта туһунан спектакль сүрэхтэммитэ. Сэттис баска спектакль кэннэ дьон санаата киирбиттэр. Кинигэни суруйан таһаарбыт Павел Васильевичка баҕарабыт кытаанах доруобуйаны, өссө да айар, суруйар талааныҥ аартыга аһылла, сытыы бүөрүҥ сыппаабакка улууспутугар олорон ааспыт дьону-сэргэни, устуоруйатын суруйа, киэҥ араҥаҕа билиһиннэрэ тур диэн алгыс тылбытын аныыбыт!
