Иван Петрович Черкашин араас дойдуларга буолуталаабыт бойобуой дьайыылар уонна быстах сэриилэр кыттыылаахтара. Хорсун, эр санаа быһыыларын көрдөрбүтүн иһин, Ийэ дойдута үрдүктүк сыаналаан, “Эр санааланыы”, “За военные заслуги “ , “III степеннээх Ийэ дойдуга үтүөлэрин иһин”, “ За службу России”, “Мужество и гуманизм I степени” орденнарынан уонна элбэх Правительственнай, ведомственнай мэтээллэринэн, грамоталарынан, түөскэ кэтиллэр бэлиэлэринэн наҕараадаламмыта. Өр сыллаах үлэтэ сыаналанан, “РФ ИДьМ туйгунунан”, “Юстиция туйгунунан”, бочуоттаах үлэһитинэн, спецназ полковнигынан буолбута. Төрөөбүт Сахатын сирин туһугар үтүөлэрин иһин Саха Өрөспүүбүлүкэтин Ил Дархана Борисов Е. А., Правительство председателин Бочуотунай грамоталарынан, “Гражданскай килбиэн” бэлиэнэн, Ил Түмэн председателлэрэ В. Басыгысов, А. Жирков Бочуотунай грамоталарынан наҕараадаламмыта. “Саха Өрөспүүбүлүкэтин норуотун хаһаайыстыбатын үтүөлээх үлэһитэ”. Уус Алдан улууһун уонна Бэрт Ууһун нэһилиэгин бочуоттаах олохтооҕо. Ону таһынан, Иван Петрович суруйар дьоҕурдаах. Саха сириттэн быстах сэриилэргэ сылдьыбыт буойун – саллааттарга анаан 3 томнаах “Время выбрало их...”( “Кэм – кэрдии кинилэри талбыта”) диэн кинигэлэри таһааттарбыта. Бу үлэлэр уол оҕону, үүнэр ыччаты Ийэ дойдуга ханнык баҕарар түгэҥҥэ бэриниилээх буолууга үөрэтэр, туохтан да толлубат эр санаалаах буоларга иитэн таһаарар сыаллаах суруллубуттар. Кинигэлэр Саха сирин ийэлэрин махталларын ылбыта. Иван Петрович “Симэлийбэт суол” уус – уран кинигэтинэн “Незабвенная тропа” диэн спектакль туруоруллан, сыллата дьон – сэргэ биһирэбилин ылар. Иван Петрович дьону түмэр, тылын ылыннарар,тэрийэр дьоҕурдаах киһи буоларын биир дойдулаахтара, табаарыстара, алтыһар дьоно билинэллэр. Кини ити дьоҕурун сөпкө туһанан, тренер, кыттааччы, судьуйа, тэрийээччи быһыытынан, араас таһымнаах улуустааҕы, өрөспүүбүлүкэтээҕи, Россияҕа уонна тас дойдуларга ыытыллар күрэхтэргэ элбэҕи ситистэ. Ол курдук, сыллата ыытыллар “Бастыҥ спортсменнар” чиэстээһин – тэрээһиҥҥэ “Республика бастыҥ тэрийээччитэ”, “Сахаада - спорт” бастыҥ тэрийээччитэ” номинациялар кыайыылаахтарынан буолбута. “Физкультура уо спорт сайдыытыгар үтүөлэрин иһин”, “СР физкультураҕа үтүөлээх үлэһитэ” бэлиэлэринэн наҕараадаламмыта. Билигин Саха өрөспүүбүлүкэтин быстах сэриилэр кыттыылаахтарын ассоциациятын уонна быраабы араҥаччылыыр уорганнар, сэбилэниилээх күүстэр ветераннарын ассоциациятын председателэ. Кэргэннээх, икки оҕолоох. Кэргэнэ, Анна Павловна, Саха Өрөспүүбүлүкэтин судаарыстыбаннай автономнай тэрилтэтин 3 № - дээх Өрөспүүбүлүкэтээҕи клиническэй балыыһатын кардиолог бырааһа. Кыыстара, Лариса, “Майона” хаарчахтаммыт эппиэтинэстээх тэрилтэ художнига. Уоллара, Эрхан, Алматы куорат (Казахстан) Сулейман Демиреля аатынан Дойдулар икки ардыларынааҕы сыһыан университетын III курсун студена.
