Ыам ыйын 15 күнүгэр “Эйэҕэс эбээлэр” түмсүү ,олохтоох библиотека көҕүлээһиннэринэн, төрөппүттэр, оскуола учууталлара, уһуйаан иитээччилэрэ, үөрэнээччилэр кыттыылаах “Саха тыла – саха тыына” төгүрүк остуол ыытылынна.
“Дьиэ кэргэҥҥэ оҕону сахалыы саҥардыахха” диэн тэрээһин бастакы чааһыгар түмсүү салайааччыта Неустроева А. Л. Саха Өрөспүүбүлүкэтин Ил Түмэнин бэрэссэдээтэлэ А. Н. Жирков уонна Ил Түмэн депутата И. И. Шамаев Ийэ тылга сыһыаннаах ыстатыйаларын билиһиннэрдэ. Саха тылын учууталларын иккис съеһин делегата Осипова Л. С. съезд хаамыытын, матырыйаалларын, уураахтарын туһунан иһитиннэрии оҥордо.
Төрөөбүт тылбыт сайдыытын билиҥҥи туругун, уһуйааҥҥа, оскуолаҕа оҕолор нууччалыы эрэ кэпсэтэр буолбуттарын билэн – көрөн олорон, бу балаһыанньаны хайдах көннөрүөхпүтүн сөбүй диэн санааттан тахсыбыт аһаҕас кэпсэтиигэ төрөппүт Неустроева А. Н., уһуйаан иитээччилэрэ Бурцева А. А., Петрова В. П.,соцпедагог Местникова О. С. бу боппуруос төрдө дьиэ кэргэҥҥэ сытарын ыйан туран, мантан салгыы тугу гыныахха сөбүй диэн санааларын эттилэр, элбэх этиилэри киллэрдилэр. Кинилэр бу тирээн турар боппуруоска төрөппүт, уһуйаан, оскуола эрэ кыһалҕаларын курдук сыһыаннаспакка, общественность бүттүүнэ кыттыһан туоратарга турунуохтааҕын тоһоҕолоон бэлиэтээтилэр. Тыл эппит кыттааччылар этиилэригэр олоҕуран, аһаҕас кэпсэтии сүнньүнэн уураах ылылынна. Уураах нэһилиэк үөрэҕин тэрилтэлэригэр, туһааннаах дьоҥҥо тиэрдиллэн, наадалаах пууннара учуоттанан, саҥа үөрэх дьылыгар ыытыллар үлэлэр былааннарыгар киириэхтэрэ этэ диэн, баҕа санааларын эттилэр.
Тэрээһин иккис чааһыгар төрөппүттэргэ, оҕолорго анаан “Тыл баар – бараммат баай” диэн өй күрэҕэ ыытылынна. “Мичээр” уонна “Күнчээн” диэн хамаандаларга арахсан, 4 этаптаах оонньууга Неустроева А. Н. капитаннаах “Күнчээн” хамаанда кыайыылааҕынан таҕыста. Итини таһынан эрдэ бэриллибит сорудахтарынан, кылаастар төрөппүттэрэ кыттыылаах мүнүүтэҕэ ааҕыы күрэҕэр алын кылаастарга II кылаас(кыл.салайааччыта Васильева М. Н.), орто бөлөххө VIII кылаас коллективтара (кыл.салайааччыта Явловская Р. Р.), “Дьиэ кэргэн – дьол уйата” дьиэ кэргэнинэн хоһоон айыытын күрэҕэр алын кылаастарга Рияна, Анна Николаевна Неустроевалар, орто бөлөххө Оля, Мария Михайловна Ивановалар кыайыылаахтарынан ааттаннылар.
“Айар” кинигэ кыһата - оҕолорго” кинигэ быыстапката туруоруллан, араас дьэрэкээн ойуулардаах, тэттик кэпсээннэрдээх, хоһооннордоох кинигэлэри биһирии көрдүлэр, кэнники сылларга “Айар” кыһа таһаарар кинигэлэрэ тупсубуттарын, кыра оҕолор болҕомтолорун тардан, интэриэһиргэтэрин бэлиэтээтилэр. Улахан оҕолорго туһалаах, наадалаах литература - справочник, энциклопедия арааһа тиһигин быспакка тахса турара хайҕаллааҕын ыйдылар.
“Норуот күүһэ – көмүөл күүһэ” диэн этиинэн салайтаран, оҕо туһугар, төрөөбүт тылбыт дьылҕатын туһугар киэн туттар киһибит, Александр Николаевич Жирков эппитин курдук, ис кыахпытын туһанан, бары бүттүүн турууластахпытына эрэ, тылбыт тыыннаах хаалыаҕа, норуот быһыытынан симэлийиэхпит суоҕа этэ диэн, өссө төгүл түмүктэри оҥостон тарҕастылар.
"Эйэҕэс эбээлэр" түмсүү
